भारतीय विदेशमन्त्री एस जयशंकरको नेपाल भ्रमण नियमित कि नेपाली सत्ता समीकरणमा भारतीय चासो ?

• Nepali Media Network
• २०८० पुष १७ गते, मंगलवार २२:४९
• • समाचार

१७ पुष, काठमाण्डौं – भारतीय विदेश मन्त्री एस जयशंकर पुस १९ गते नेपाल आउन लागेका छन् । प्रधानमन्त्री निकट स्रोतका अनुसार विदेश मन्त्री एस जयशंकरको यो नियमित भ्रमण भएको र उनी नेपाल–भारतको बिचमा रहेको संयुक्त आयोगको बैठकमा सहभागी हुन आइरहेको बताएका छन्। नेपालमा भारतीय उच्च अधिकारीको भ्रमण वरिपरि नेपालको सत्तापरिवर्तन भएका दृष्टान्तहरू पनि छन् । अहिले मन्त्री फेरबदल को कुरा प्रधानमन्त्री स्वयंले गरिरहेका छन् भने कांग्रेसको एउटा पंक्तिले सरकारले प्रभावकारी भूमिका खेल्न सकेन जनतामा निराशा बढ्यो यो सरकार परिवर्तन गर्नुपर्छ भनेर आवाज पनि उठाइरहेको छ ।

नेपालको तर्फबाट उनको भ्रमणका लागि लगभग तयारी पुरा भएको बुझिएको छ । परराष्ट्र मन्त्रालयका एक अधिकारीले भने, ‘उहाँ दुई देशबिच मन्त्रीस्तरीय हुने नियमित बैठकमा आउन लाग्नुभएको छ । त्यो बैठकमा प्रस्तुत हुने एजेन्डाबारे हाम्रो तयारी लगभग पुरा भएको छ ।’

आयोगको बैठकमा प्रस्तुत हुने एजेन्डाबारे परराष्ट्र मन्त्री एनपी साउदले प्रधानमन्त्री प्रचण्ड सँग छलफल गरिसकेका छन् । त्यसै गरी मंगलबार मन्त्रालयमा परराष्ट्र मन्त्रीले पूर्वपरराष्ट्रमन्त्री, पूर्वपरराष्ट्रसचिव र भारतका लागि पूर्वराजदूतहरूसँग पनि संयन्त्रको बैठकबारे छलफल गरेका हुन् ।

छलफलका क्रममा उपस्थित अधिकारीहरु सँग भारतीय विदेश मन्त्री जयशंकरको भ्रमणको क्रममा कस्ता–कस्ता विषय छलफलमा लैजाने भन्ने बारेमा परराष्ट्र मन्त्री साउदले राय मागेका थिए । जलविद्युत् व्यापार, क्रस बोर्डर कनेक्टिभिटी, रोकिएका कामलाई सुचारु गर्ने लगायतका विषयमा सरोकारवालाहरूले सुझाव दिएका छन् ।

भारतको आफ्नै योजना र लक्ष्य हुन्छ उसले तहीँ अनुरूप छलफललाई अगिबढाउँछ अहिले उसको सबभन्दा बढी चासोमा रहेको अरुण तेस्रो जलविद्युत् आयोजना र पञ्चेश्वर जलविद्युत् आयोजनामा विशेष छलफल हुने स्रोतको दाबी छ । परराष्ट्र मन्त्रालय स्रोतका अनुसार ‘ऊर्जा मन्त्रालयले परराष्ट्र मन्त्रालयसँग समन्वय गरेर त्यसको बारेमा गृहकार्य गरिरहेको छ,आयोगको बैठकमा पञ्चेश्वर लगायतको विषयमा छलफल हुने देखिन्छ ।’

समाचार ब्युरो
नेपाली मिडिया नेटवर्क