कोशी प्रदेश राष्ट्रिय सभा निर्वाचनमा एक कदम पछि हट्यो एमाले ,अब राप्रपा सँग तालमेल गर्ने

• Nepali Media Network
• २०८० माघ ८ गते, सोमबार १६:१८
• • समाचार

माघ ८,काठमाडौँ – यहीँ माघ ११ गते हुन गइरहेको राष्ट्रिय सभा निर्वाचनमा एमाले र राप्रपा बिच तालमेल गर्ने सहमति भएको छ।निर्वाचन आचारसंहिता लाग्नुभन्दा केही घण्टाअगाडि एमाले र राप्रपाबिच गठबन्धन गरेर जाने सहमति भयो । सहमति अनुसार एमालेले अन्य तर्फका उमेरद्वार प्रर्शुराम अधिकारीको ठाउँमा राप्रपाका उद्धव पौडेललाई मत हाल्ने र राप्रपाले एमालेकी महिला तर्फकी उमेरद्वार रुक्मिणी कोइराला लाई मत हाल्ने सहमति भएको छ ।

कोशीमा राष्ट्रियसभाका लागि ३ सय ६७ मतदाता छन् । तीमध्ये ९३ जना प्रदेशसभा सदस्य हुन् । प्रदेशसभा सदस्यको मतभार ५३ हो । स्थानीय तहका २७४ प्रमुख तथा उपप्रमुखको मतभार १९ हुन्छ ।
प्रदेश र स्थानीय तह गरेर एमालेको ४ हजार २४८, कांग्रेसको ३ हजार ६८४, माओवादी केन्द्रको १ हजार २७८, राप्रपाको ३९४, नेकपा एकीकृत समाजवादीको ३४५, जसपाको १२९ र स्वतन्त्रको ५७ मतभार छ ।

जसअनुसार सत्ता गठबन्धनको मतभार ५ हजार ४७४ छ भने एमाले–राप्रपा गठबन्धनको कुल मतभार ४ हजार ६४२ छ ।

कांग्रेसकै कतिपय नेता एमाले र राप्रपा मिलेसँगै सत्ता गठबन्धनलाई निर्वाचन जित्न सहज नदेखिएको दाबी गर्छन् । किनकि यसअघि पनि सत्ता गठबन्धनलाई मतदाताले धोका दिएको उदाहरण छ ।

२०७८ साल माघ १२ गते भएको राष्ट्रियसभा निर्वाचनमा मत क्रस हुँदा सत्ता गठबन्धनका उम्मेदवार जसपाका हेमराज राईलाई पराजित गर्दै एमालेका सोनाम ग्याल्जेन शेर्पा विजयी भएका थिए । तर, त्यसबेला सत्ता गठबन्धनको मत र एमाले गठबन्धनको मतको अन्तर निकै कम थियो । त्यसबेला स्थानीय तहतर्फबाट गठबन्धनका २९ जनाले फ्लोर क्रस गरेर एमालेका शेर्पालाई मत दिएका थिए ।

पुनः त्यही अवस्था दोहोरिएको खण्डमा सिटौलासहित सत्ता गठबन्धनकी अर्की उम्मेदवार कार्कीलाई जित निकाल्न गाह्रो हुने देखिन्छ ।

उता निर्वाचन आयोगले राष्ट्रिय सभा सदस्य निर्वाचनका लागि आवश्यक मतपत्रहरू सातै प्रदेशका निर्वाचन अधिकृतहरूको कार्यालयमा पठाएको छ ।

राष्ट्रिय सभा सदस्य निर्वाचनमा प्रदेश सभाका सदस्य र गाउँपालिकाका अध्यक्ष र उपाध्यक्ष तथा नगरपालिकाका प्रमुख र उपप्रमुख रहेको निर्वाचक मण्डलद्वारा मतदान हुने कानुनी व्यवस्था अनुसार प्रदेश सभाका सदस्यका लागि सेतो रङको कागजमा हरियो रङको मसीको विवरण तथा निर्वाचन चिह्न रहेको मतपत्र र गाउँपालिकाका अध्यक्ष र उपाध्यक्ष तथा नगरपालिकाका प्रमुख र उपप्रमुखका लागि सेतो रङको कागजमा रातो रङको मसीको विवरण तथा निर्वाचन चिह्न रहेको मतपत्र छापेको आयोगले जनाएको छ ।

प्रदेशगत रूपमा रहेका निर्वाचक मण्डलका सदस्यको सङ्ख्या तथा निर्वाचन हुने पद सङ्ख्यालाई आधार मानेर आयोगले कोशी प्रदेशमा हुने दुई पदको निर्वाचनका लागि चार प्रकारका ९२० मतपत्र पठाएको आयोगले जनाएको छ ।

आगामी २०८० फाल्गुन २० गते देखि रिक्त हुने १९ राष्ट्रिय सभा सदस्य पदका लागि माघ ११ गते निर्वाचन हुनलागेको हो। उक्त निर्वाचनको मतदानका लागि ३८ प्रकारका कूल ६ हजार ९१० मतपत्रहरू छापिएको आयोगले जनाएको छ ।

समाचार ब्युरो

नेपाली मिडिया नेटवर्क