छानबिन समिति बनेपछि रवि पदमा बसिरहनु ‘नांगो भएपछि पनि कपडा लगाएको ठान्नु हो’-प्रदीप पौडेल

• Nepali Media Network
• २०८१ जेष्ठ २६ गते, शनिबार १३:०३
• • राजनीतिक

जेष्ठ २६ गते,काठमाडौं । नेपाली कांग्रेसका सांसद प्रदीप पौडेलले संसदीय छानबिन समिति गठन गरिसकेपछि पनि नैतिकताको बोध नगरिने राजनीतिको अभ्यास नेपालमा गम्भीर विषय बनेको बताएका छन् । शनिबार काठमाडौंमा आयोजित कार्यक्रममा उनले राष्ट्रिय स्वतन्त्र पार्टीका सभापति समेत रहेका उपप्रधान एवं गृहमन्त्री रवि लामिछानेप्रति लक्षित गर्दै यस्तो टिप्पणी गरेका हुन् ।

राजनीतिमा नैतिकता व्यक्तिसँग निर्भर रहने भन्दै नैतिकताको बोध नगरिने राजनीति कांग्रेसले अन्त्य गरेर छोड्ने दाबी गरे । उनले सहकारीमा रकम अपचलन विषयमा छानबिन समिति बनिसकेपछि पनि उपप्रधान एवं गृहमन्त्रीकै पदमा रहिरहनु ‘नांगो भइसकेपछि पनि आफूलाई कपडा लगाएको ठान्नु’ रहेको टिप्पणी गरे ।

छानबिन समिति बनाउँदा पनि राजीनामा दिनुपर्दैन भनेपछि मात्रै संसदीय छानबिन समिति बनेको पौडेलको दाबी छ ।

नेता पौडेलले जनप्रतिनिधिको आवरणमा जनतालाई ठग्ने काम भइरहेको समेत बताए ।

समाचार ब्युरो
नेपाली मिडिया नेटवर्क