प्रधानमन्त्री ओली स्वदेश फिर्ता,प्रचण्डले भनेझै चिनीया कार्डप्ले कि भ्रमण उपलब्धिमुलक

• Nepali Media Network
• २०८१ मंसिर २० गते, बिहीबार १६:१२
• • समाचार

मंसिर २० गते, काठमाडौं -प्रधानमन्त्री केपी शर्मा ओली चीनको चारदिने औपचारिक भ्रमण पूरा गरी आज स्वदेश फर्किनु भएको छ। यही मंसिर १७ गते बेएजिङ जानुभएका प्रधानमन्त्री ओली आज दिउँसो काठमाडौं आइपुग्नुभएको हो।

बेइजिङमा रहँदा प्रधानमन्त्री ओलीले चीनका राष्ट्रपति सी जिनपिङ, प्रधानमन्त्री ली छ्याङ लगायतसँग बेग्लाबेग्लै भेटवार्ता गर्नुभएको थियो । त्यही क्रममा नेपाल र चीनबीच बीआरआई फ्रेमवर्कसहित विभिन्न महत्वपूर्ण सम्झौताहरु भएका छन् ।

बेइजिङमा बुधबार दिउँसो भएको फ्रेमवर्क सम्झौतामा नेपालका तर्फबाट परराष्ट्र मन्त्रालयका कामु सचिव अमृतबहदुर राई र चीनका तर्फबाट चीनका नेशनल डेभलपमेन्ट एण्ड विकास रिफर्म कमिशनका उपाध्यक्ष लिउ सुशेले हस्ताक्षर गरेका थिए।

यी हुन् फ्रेमवर्कभित्र परेका परियोजना
१. टोखा-छहरे टनेल

२. हिल्सा-सिमिकोट सडक योजना

३. किमाथांका-खाँदबारी सडक र पुल

४. जिलोङ-केरुङ-काठमाडौं रेलमार्ग

५. अमरगढी सिटी हल प्रोजेक्ट

६. जिलुङ-रसुवागढी-चिलिमे २२० केभी प्रसारण लाइन

७. मदन भण्डारी प्राविधिक विश्वविद्यालय

८ .काठमाडौं साइन्टिफिक सेन्टर र साइन्स म्युजियम

९. चीन-नेपाल औद्योगिक पार्क दमक

१०. झापा स्पोर्ट्स एन्ड्स एथलेटिक्स कम्पलेक्स

नेपाल र चीनबीच भएको टोखा–छहरे सुरुङमार्ग निर्माणसम्बन्धी समझदारीपत्रमा दुवै देशका सम्बद्ध अधिकारीले हस्ताक्षर गरेर आदानप्रदान गरेका छन् । यसैगरी नेपाल–चीन व्यापार अभिवृद्धिसम्बन्धी समझदारीपत्रमा हस्ताक्षर भएको छ ।

चीनले काठमाडौँको वसन्तपुरस्थित नौतले दरबार पुनःनिर्माण सम्पन्न गरेको प्रमाणपत्र आदानप्रदान भएको छ । यसका साथै भैँसीको मासु चीन निर्यातसम्बन्धी प्रोटोकलमा समझदारी भएको छ ।

विकास आयोजना, आर्थिक तथा प्राविधिक सहयोग तथा नगद सहयोगसम्बन्धी सम्झौता र समझदारीपत्रमा हस्ताक्षर भएको छ । भ्रमणका अवसरमा स्वयंसेवी चिनियाँ भाषा शिक्षकसम्बन्धी समझदारी तथा नेपाल टेलिभिजन र चाइना मिडिया ग्रुपबीच सञ्चार प्रविधिसम्बन्धी समझदारीपत्रमा हस्ताक्षर भएको छ ।

यसैबीच प्रधानमन्त्री ओलीले चीनका प्रधानमन्त्रीलाई नेपाल भ्रमणको निम्तो दिनुभएको थियो । यसबारे चिनियाँ प्रधानमन्त्रीबाट सकारात्मक बचन प्राप्त भएको जनाइएको छ ।

प्रधानमन्त्री ओलीले बेइजिङमा बुधबार आयोजित ‘नेपाल–चीन बिजनेस समिट’लाई सम्बोधन गर्दै नेपालमा लगानीको वातावरण बन्दै गएको भन्दै ढुक्क भएर लगानी गर्न आग्रह गर्नुभएको थियो ।

प्रधानमन्त्री ओलीले बुधबार नै चिनियाँ कम्युनिस्ट पार्टीको बेइजिङस्थित संग्रहालय अवलोकन र पेकिङ विश्वविद्यालयमा सम्बोधनसमेत गर्नुभएको थियो ।

समाचार ब्युरो
नेपाली मिडिया नेटवर्क