२०८२ फाल्गुन ६ बुधबार
18 February 2026, Wednesday
Nepali Media Network 
फागुन १४ गते,काठमाडौँ —महाशिवरात्रिका अवसरमा पाँच लाखभन्दा बढी भक्तजनले पशुपतिनाथको दर्शन गर्ने पशुपति विकास कोषले जनाएको छ । ‘यसपटक मन्दिरभित्र करिब ५ लाख दर्शनार्थी आउने अपेक्षा गरेका छौं’, पशुपति विकास कोषका कार्यकारी निर्देशक सुवासचन्द्र जोशीले भने, ‘त्यस्तै बाहिरबाट मन्दिर (गजूर) दर्शन पनि ५ लाख हाराहारीले गर्ने अनुमान कोषले गरेको छ ।’
जोशीका अनुसार शिवरात्रिका अवसरमा मंगलबार राति २ बजेदेखि मन्दिर खुला गरिनेछ । शिवरात्रिका दिन दर्शनार्थीको भीड नसकिउन्जेलसम्म मन्दिर खुला रहनेछ र मूल भट्टसहित ५ जना भट्टहरू मन्दिरमा रहनेछन् ।
त्यस्तै पशुपति मन्दिरका चार ढोकाका आधारमा चारवटा लाइन बाहिरबाट मन्दिरभित्र पस्ने व्यवस्था गरिएको कोषले जनाएको छ । मन्दिरभित्र ती चार लाइनलाई १० वटा सहायक लाइन बनाएर प्रत्येक भक्तजनले २ सकेन्ड दर्शन गर्न पाउनेछन् । ‘सर्वसाधारणले लाइनमा धेरै समय बिताउनु नपरोस् भनी बाहिरबाट मन्दिरभित्र पस्ने चारवटा लाइनलाई १० वटा शाखा लाइन बनाएर मन्दिरका चारवटै ढोकाबाट २/२ सेकेन्ड दर्शन गराउँदै निकाल्ने व्यवस्था गरिएको छ’, कोषका कोषाध्यक्ष नारायण सुवेदीले कान्तिपुरसँग भने ।
विगतमा शिवरात्रिमा वितरण गरिने पास दुरुपयोग भएको भन्दै कोषले यसपटक पास खारेज गरेको छ । भीभीआईपी र भीआईपी दर्शनार्थीलाई पशुपति मन्दिरभित्र लैजान वनकालीमा रहेको कोषको कार्यालयमा हेल्प डेस्क राखिएको छ । कोषका कार्यकारी निर्देशक जोशीको संयोजनमा भीआईपी अतिथिले मन्दिर दर्शन गर्न पाउनेछन् । त्यस्तै वृद्ध, अपाङ्गता भएका व्यक्तिलाई कोषले वनकालीमा रहेको हेल्प डेस्कबाट सोझै मन्दिर लैजाने सुविधा दिने जनाएको छ । लाइनमा रहने वृद्ध तथा अपाङ्गता भएका व्यक्तिहरूलाई स्वयंसेवक तथा सुरक्षाकर्मीले सघाउने कोषले जनाएको छ ।
कोषले शिवरात्रिका लागि यसपटक डेढ करोड बजेट विनियोजन गरेको छ । उक्त रकम पशुपति मन्दिर परिसरमा रंगरोगन, साधुसन्तलाई खानपान, धुनीका लागि दाउरा/मुढा व्यवस्थापनलगायतमा खर्च गरिने कोषले जनाएको छ । साधुसन्तलाई कोषले निर्मल अखडा, अन्नपूर्ण अखडा, भष्मेश्वर अखडा, विश्वरूपा अखडा गरी ७ वटा स्थानमा राखेको छ । ती स्थानमा उनीहरूका लागि कोषकै खर्चमा खानपानको व्यवस्था गरिएको छ ।
कोषले शिवरात्रिमा आएका साधुसन्तलाई बिदाइ गर्दा कोष र गुठी संस्थानका तर्फबाट ‘बिदाइ दक्षिणा’ दिने प्रचलन छ । यसमा दुवै संस्थाले बराबरी रकम दिनुपर्ने प्रचलन छ । पशुपतिस्थित गुठी संस्थान कार्यालयकी प्रमुख सुशीला शर्माका अनुसार शिवरात्रिमा पशुपतिमा आउने साधुहरूलाई महन्त, मठाधीश, नागा र अघोरी गरी चार प्रकारमा विभाजन गरिन्छ । त्यसैका आधारमा उनीहरूलाई बिहीबार बिदाइ दक्षिणा दिइने कोषले जानकारी दिएको छ ।
कोषले शिवरात्रि व्यवस्थापनका लागि नौवटा समिति बनाएको छ । समग्र सुरक्षा व्यवस्थापनका लागि कोषका कार्यकारी निर्देशक मिलन थापाको संयोजकत्वमा समिति बनाइएको छ । त्यस्तै मन्दिरको सौन्दर्य सजावटमा राजु केसी, अनुगमनमा कोषाध्यक्ष नारायण सुवेदी, साधुसन्तको व्यवस्थापनमा परिषद् सदस्य भरत बराल, जुत्ता–चप्पल तथा सफाइमा रेनुका पराजुली, आवास/भोजनमा बाबुशरण केसी, स्वयंसेवकमा हरिनाथ ढकाल, स्वास्थ्यमा शिक्षित पराजुली र चन्दन वितरणमा रामेश्वर संगतलगायतका परिषद् सदस्यहरूलाई तोकिएको छ ।
शिवरात्रिको तयारी अनुगमन गर्न प्रधानमन्त्री केपी शर्मा ओली, संस्कृति, पर्यटन तथा नागरिक उड्डयनमन्त्री बद्री पाण्डे, काठमाडौं जिल्ला प्रशासन प्रमुख, सुरक्षा निकायका प्रमुखलगायत मंगलबार बेलुका पशुपति क्षेत्र पुगेका थिए । यसपटक पशुपति परिसरमा नेपाली सेना, प्रहरी, सशस्त्र प्रहरी, राष्ट्रिय अनुसन्धानका गरी ७ हजार सुरक्षाकर्मी र ४ हजार स्वयंसेवक परिचालन हुने कोषले जानकारी दिएको छ ।